مشتاگ الك
شوگ النده للورد
او شوگ النخل للماي
يالتمشي بي نبض
ابكل ابتأني او رهدنه
مشية طفل بهداي
كل خطوه منك عشگ
بيهه أذوب او أحترگ
ياخذني الخيال ابعيد
واتطشر أغروب او ناي
اسرح ابدنيه الهوه
كل شهگه أحسك طبگ
مثل اسمي صرت اوياي
يا لعب الجهل يا ترف
يا شوگ عشك اصباي
بالبيك فرحه ذبت
يالطرزت دنياي
طيبه او محبه او غنه
يالفكرك أحله فكر
او رايك اجمل راي
اتساميت بسمك وفه
ابجالك كبرت اهواي
طاولت حته النجم
او غنه الگمر وياي
چوبيه والريل او حمد
واصويحب الوفاي
اشگد بيك عزة نفس
و اشكبر عندك راي
بالشته طبعك دفو
او بالصيف طبع افياي
ما تلفت للمضه
عينك تصد للجاي
مكروه حچيي الدغش
عندك بلا شراي
يمناي أنته أصبحت
وانته ابفخر يسراي
حبك ابوسط الگلب
وي النبض يسراي
يحچايتي بالعلن
يا غنوتي يسراي
برموشي شلتك كحل
يا يسرتي او يمناي
شوگي الك
شوگ النده للورد
او شوگ النخل للماي
شو گ النخل للماي
ــــــــــــــــــــــــــــــــــــــــــــ
الناصرية ٧/ ٨/ ٢٠٢٥