افكر بالجروح ..

الأمس .. قدنه

قميص وصار لحنه الناي

افكر .. بالسؤال

الطاح من راسي

وطحت والفشل طاح وياي 

من شفت السؤال 

يفزز الثاني

وأنا الخالي جواب و راي

ويفوت الصدى ويعود

يسحگ صفنتي بحيله

ويثلم الحجي الفوگ شفاي

من گد ما یمر بیه ..

الضوه بلا شوف ..

سويت الظلام دواي

حتى الليل  ..

يتدنه عله عيوني

وينزعها .. أثر كل طيف

سولف للصبر بصباي

خلاني اشوف الأسئله .. غابه

وغصب ..  چفه الوكيح

براسي شاتلها

ومابین العطش والموت ..

عفيه هموم

مدري شلون شايلها

ولا غيم لجواب يفوت

جاب وياه جذب أبيض

تعنه لروحي بللها

و حالفله بسراب

من الصبه الخاثر

يگله دروبي یندلها

يروحي الدنيا

وي يا طول .. وي يا لون

لو عتگت .. نبدلها

ومن حرمت الآماني

أعله العمر .. يا صوت

بسته يرد يحللها

وأنا بعيني

رمح .. شفت السؤال

وفزه من وحشي

وأله النيشان ..عنواني

ولگیت اللیش ..

تطلگ تیه .. والحیره ..

تدور بفلكة احزاني

وأرد مطلوب .. واجوبتي ..

مسله ومر عليها

بغيض دياني

انا الرديت ..

شايل غيضتي مناوب

جمر ويطوف ذرعاني

الك رديت

خالي عتاب

سكته .. الموت غناني

وطحت بيدك

رماد  بلا عرف وأنخاك

دلي الريح بيباني

واگلب اللیش ..‌ وألگاها

اعله جید شفاي

عاشت کشخت گلاده

و یظل نفسه السؤال ..

يفتش سنيني ..

ويخم بجيوبها مراده

ولا سافر شفت مره 

وترك راسي ..

ولا من بطل عناده

اريده يروح عن خلگي

شكثر وديتله طروشي

دعاوي بهيبة الساده

ولمن شفت الوكت

لچني على الهامش ..

واعرف الهامش  زياده

اشتهيت الموت .. وأتمنيت

كل صرخه لجرح

ما دفت ضماده