(گطان چني طحت مابين عچلة فال
واحد لالخر يگلّه هو ولك نوحه) .... الحاج زاير الدويچ
إلى روح الشاعر الراحل كاظم لاله
مشيت أوياك ..
بدروب اليلم بيها الحزن روحه ..
أويطگ سكته
واتخّضر مراجلها
ترس عمر الليالي أنذور
وكت ماتنگل أسنينه جدم وتفوت
او وكت .. تتسابگ الخطوات
بيه امشرعبه أعله الموت
وعمر يبحر رمل..
يشرب بواجي الناس ..
من يطفه اعله جفها الصوت
او لگيتك ..
عمر مافرشته الصنطة الصبرها ..
والمشتله أذنوب ..
والشربت خياله أدروب
اسمه ...
بكل جرح ..
بيه تغبش الدنيا ..
شمس .. مكتوب
لگيتك ..
يل على اكتاري ..
ضوه .. أوماي ..
أوعشگ صفصاف
تترادف نعاوي الريح
وأنته ابديرتك خّطاف ..
أنته ابديرتك خطاف ...