الكهوه فرغت
والنراكيل انطفت
وحشه صارت
لااغاني ولا صياح ولا جكاير
تخت ظل يسأل تخت :
وين ناسك؟
_ كلمن لحاله مشه
وباجر يردون ..ويروحون باجر
والسوالف تغسل بشذر استكانك
انته هم اتروح وترد لمكانك
راح نص عمرك خساير
خايف امن الجاي
يمضيع زمانك
شيبك ..وخرزات سبحه
بين اصابيعك يلعبن
جنهن الأيام..من اتروح وترد
جنهن اسنين العذاب البيهن اتعد
الكهوه .. تفتح بابها الغبشه
وتغلكه اباول الليل الجنوباوي الحزين
تبدي وادمهه تجيهه
وكلمن ايروح لتخت
يصعد الصايح ويخلص يومها
لاسمعت( حضيري ).. لا ( عبد الحليم )
ناس تمدح بالملوك
وناس تمدح بالزعيم
وناس تشتم بالملوك
وناس تشتم بالزعيم
وتخت يصرخ بالتخت
والحكومات التجي وتروح مثل الناس للكهوه ..
وتسبهه الناس
لنهه ابلايه حظ .. ولا بخت
الكهوه من يكبر سكفهه
ايشع عراق اول واشوفن بي:
حمامات الكنيسه، وعتبة الجامع ، والحسينيه و” المندي “ ..
العراق الأول ابراسي حبيب
ويشبه الكهوه اذا يزغر سكفهه
ايشع علينه .. ايضوي بينه :
هور .. نايات .. ومواويل
وكصب مهيوب.. طوله امحمداوي
ابراسه “ سيد محمد” *
ايغني ثغيب .. ثغييييييب
ايودي شوغات ويجيب
ياعراق المامش لعلتك طبيب
الخانكك والبايكك كلللش صلف
ياعراق
اصواب دلالك كلف ..
كلللش كلف