الى الشاعر الكبير واالنسان عبد الكريم گاصد
غنيت من لوعتي مو من كثر راحاي
وچفوف اديه انبرن وانه افرك ابراحاي
كل نوحي على اللي بقه مو عالذي راحاي
غدران دمعي جره فوگ الارض وانهار
لا صيف عندي وشته ولا ليل الي ونهار
واللي بنيته بعمر ابلحضه انهدم ونهار
صكيت ضرس الندم واتكسرت رحاي
..................
يلواعدت وين صار امزامطك او وعداك
واشفاد مشيك وره الماله اصل واعداك
عالشين بس علمك من خصلته وعداك
يل چنت مثل الگمر تضوي واتشع بسماي
ولو ردت تحچي صدگ تحلف گبل بسماي
هسه اتشوف الدمع من ناظري بس ماي
يمته اتفرزن بين صاحب وفي وبين اعداك
...........................
افترگ ضعن النودهم عن دربنه وشت
والعقل مني تزحزح عن مكانه وشت
من يوم يا صاحبي ليك العواذل وشت
الحب الذي ابگلبك تبدل والعدوي دار
بسكوت دمعي يهل ومحد ابهمي دار
چنت امرح ابسد هلي وجيران اليه ودار
هسه اصبحت بور لا صيف اليهمني وشت
............................
اريد اصبغ من الحزن ثوبي ابصبغ داره
وما التقي ويه النذل ولا اوصل ال داره
انه الذي لكل شهم طول الوكت داره
هسه صرت بعيونهم مثل السراب ابعيد
ما شاركوني ابحزن ولا فرحوني ابعيد
للطيبه ذاته تراهو الدرب موش ابعيد
الردي اصله ردي موش الوكت داره