أتمنه المنصه اتصير شاعر
توگف إو ننعيك
واتمنه يجي "قصر النهايه" للحزب
يعتذر ويعزيك
وأتمنه الأماني السافرات وياك
تصبحك بالمحبه وتگعد اتمسيك
وأتمنه المطر خطار بات اوياك
أُميه من الزلال من العطش يرويك
وأتمنه العطر أحله الچفافي إيصير
وعله اخدودك يمر بوسات ويراضيك
يا بستان حب.. وشجر من ليمون
لو تفاح لو رمان لو زيتون
ويا أحله القصايد من يمر طاريك
يا شباچ غبشه او طين هاي الگاع
تدري إشگد صبرنه إشگد
صبرنه اعليك
جرح واگف إبليله وينزف إمن سنين
فارش عينه الك عالدرب ويتانيك
ومن خوفي صرت ناطور عالبيبان
أخاف البوب تنسد وآنه جيت اتنيك
يا ريحة أهلنه وثوب من وجدان
يا طيبة نجابه ابيا كتر نلگيك
ويا مهرة شمس مر بينه وكت اغروب
لأن سرب الفخاتي رايد ايوصيك
يگلك.. فك شبابيچ العشگ للجايي
نفرشلك جنحنه افراش ونغطييك
وألملك نهر بچفوفي واگلك هاك
النهر وچفوفي إلك إشرب لمن يكفيك
فكرك خاف منه النذل والجلاد
جسد صفوط.. بس فكر الشرف لليوم
عايش بيك
سلام آنه اجيت أرثيك
لا عفواً.. اجيت ابچيك
لگيت النخل كاتبلك قصايد
گبل ما أرثيك لو ابچيك