مهداة للحزب الشيوعي العراقي بعيده 91
سلام الناس إلكم كبر الظنون
وعلى كد الفرح بعيون الأطفال
على كبر السمه والكاع والكون
على عد الورود وكثر الرمال
على الشالوا وطنهم بين العيون
وحرسوا وحدته الهوره والجبال
على الطشوا فكر طيبه يزرعون
وقدموا للعراق أجيال وأجيال
سلام الناس ع المبدأ يموتون
ويتعنه المنايه أبراحة البال
شيوعيين للصعبه يركبون
يروّض مهرته ويصعدها خيال
يحزّم للفلح ساعة يغبشون
وحاصود السنابل شكبن وشال
يشد جاكوج ليده أويه اليدكون
ويطك اللحام أبحيل عمال
يمد أبساط خوّه لليضيفون
ويكص سجين زنده ويشبع إرجال
أشنظمولك شعر وأشما يكتبون
ما يوفون حكك قيد مثقال
بيضه رايته وحمره تشوفون
من دم الرفاق أبطعنة انصال
لبناتي وأمهاتي ولليهنون
هلهلن يا خواتي بان الهلال
***
يبوا أجروح الجبيره أشما ينوجون
يسد باب العتب ويسامح العال
على كبر العراق وجرحك أيهون
ما هدك جرح وأشما كصه وطال
خلخال السلاسل من يقيدون
ومرجوحه المشانق لعبة أبطال
يكبر بالمنافي أشما يهجرون
ومن نبراس صبره كتبوا أمثال
ما يوكف إباب أويّه اليمدحون
ولا مجد صنم لا صار طبال
يروّيهم عذب كلما يعطشون
ويكرم ميته ويفرح بالوشال
يبو إيد النظيفه أشكد ينهبون
يسلبون الفقير وحملوا إجمال
متهمه الكراسي أشلون متكون
ولا يركض عليها وينسج آمال
البزايز حصته وغيره اليصدرون
لا عارض القسمه ولا شكه الحال
ما تحتاج بيبانك يحرسون
لأن أنت الأبو وكل شعبك إعيال
***
أفك باب العتب وأتعاتب أشلون
وبيك أمن الجروح ألوان وأشكال
النوارس والبلابل ما يغنون
وكفت ع الشجر ممسوخه تمثال
باكوا ضحكة أهلك ما يفرحون
وجثث فوك الجثث من شعبك أتلال
مو ماي الفرات ودجله يجرون
على دم العراق أدمعوهن سال
ترضه للعراق آيبات مرهون
مره للئيم ومره لنذال
يا فحل النخل منك يلكحون
ومن بستان رايك ترسوا إسلال
كليط الكوم من تحجي يسنطون
وتنظرلك أعيون وتكتب إشكال
من نفضة عباته الكل يهابون
وألف أحساب تحسب وجهه لو مال
يبو الغيره الشهم غيرك يحشمون
وتنهضلك أسود وتنتخي أشبال
بشيباتك يبو النخوه يباهون
يباري العيط حيله ويشتل التال
واحد وتسعين عمره إنزفله خاتون
ويخلّف للعراق أشبال ورجال