الليله أموت الليله آخر ليله
الغيم مد ايده عل راسي
والمطر شد حيله
الليله گطرات العمر ناگوط حبْ سهران
يمه ادخيلچ اترجاچ ضميني بسواد الشيله
الليله ليله هد عليّه الليل بخيول الظلام
منين اجيب الحيل ويرد خيله
حيرتني ضنون موتي أوفْ
نعشي شلون اوصله لباب أهلنه
ومنو يگابلني عليه ونشيله
الليله أموت الليله گلبي ينام دافي
وتندفن وياه حرارة چيله
الدم ينبع من سراديب الضلوع
ويرسم اجروحه على الفانيله
وطير من بين الضلوع يطير
وتلحگه السهام وقيس يخسر ليله
وگمر سكران اعله ميز اقمار ضيع ليله
تفيض روجات الحسافه وتكسر الشط
ياسنيني الرايحات
وداعة الله موادع الخلْ لخليله
يانهر ياعاگر احبل
ضوگ طعم الفاجعه بموتت فسيله
وصيح ياهور الحزن!!!
لاتغفه ياهور الحزن تابوت أجاك وي الگصب
وبهداي حطه عالجرف...
ومحمداوي من الگلب غنيله!!!