اخر الاخبار

في عشية الأول من أيار عيد العمال العالمي وجد الرفيق د. عبد الحميد الفرج بين أوراقه القديمة التي تعود الى ستينيات القرن الماضي، قصيدة للشخصية الوطنية الشاعر الأستاذ عبد الأمير حسين المظفر، تتغنى بهذا اليوم المجيد وبقائد الثورة البلشفية فلاديمير ايلتش لينين. وقد حاولت ان اقترب من بعض الكلمات غير المفهومة وأضعها في المسار القريب من النص الأصلي.  

سلام القريني

******************  

على الرغم من أنني لست شيوعيا، فقد هزتني ثورة أكتوبر الاشتراكية العظمى عام ١917 فعبرت عن مشاعري الوطنية

في هذه القصيدة

عفيه ايد.. الغيرت عقل البشر

عفيه كلمن.. ينتجي اعليها انتصر

وليعاديها.. ابعزيمتها اندحر

عفيه ايد البيها برهان النضال

عفيه ايد الهشمت حتى الجبال

 *****

عفيه ايد الشالت الشمعة ومشت

وليعاديها، فنّه وفلشتّ

عفيه ايد ابسرعة ردت عشعشت

وأصبح السلطان الها ابكل مجال

عفيه ايد الزعزعت أعتى الجبال

 *****

عفيه ايد وبعد أردن، عفيه ايد

وعفية كلما كطعوها أترد تزيد

وكل مآثرها صفت للدنيه عيد

وحزب منها انبثق للعالم مثال

وصار ايار المصانع للرجال

*****

وعفيه ايد الما نشف دمها ويسيل

وعفية فكرة المنها يهدي الكل سبيل

بيها احلام البشر جيلا فجيل..

وبيها دولاب الامل سار ابدلال

عفيه ايد الما مشت يوم ابخيال

وعفيه فكره الصار ما يمها هنه

وصارت قيود المحبة اتشدنه

وصارت تضوي ابمشاعل بس لنه

وعفية عيد الحرر جيوش العبيد

وعفية ايد وبعد أردن عفيه ائيد

 *****

وعفيه ايد الخلدت يوم النصر

وصارت اضحاياها تضوي بكل فخر

وكلمن يعاديها سَلَم واندحر

وعفية ايد العمرت ارض وفضاء

وصعدت اصواريخ تسبح بالسماء

*****

وعفية ايد الحولت اترابك ذهب

ولو نكرها اتخطه شمعة ابكل ادب

ولو تصور ترسم الثورة ولهب

وعفيه ايد الشعشعت بأرضك بهاء

وعفية ايد القدمت أجمل عطاء

 *****

وعفية ايد الغيرت اعقول الامم

وسارت ابوثبات حمرة اعله الظلم

وعفية ايار الولد زاهي ابتسم

وعفيه ايد الشيدت كل هالرخاء

وايد من هاي السواعدها رجاء

 *****

هاية ايد

هاية ايد السارت ابدرب النضال

وهاية ايد الجمعت اكلوب الرجال

وهاي تنشرلك فكرها

وصارت اهداف ومثال

وبيها كل عامل تحزم                   

لجلك وثار ابلاء

وخله دمه وكل وجوده

ويعمل لشعبه ابسخاء

وارجع ارجع

وارجع، لبغداد سلها        

 وسلها عن الكبرياء

وكلها منهو الثار بيها     

وقاوم بعزة واباء

ومنهو بضرابه تفنن       

واقتحم حته السماء

وارجع لبصرتنه واسال

من سبقني ورد النداء

تروي

تروي مينائك جعلته

بدمي وافكاري ضياء

وحتى جسر الوثبة يشهد

وثبتي ويروع الصراع

وارض كاورباغي تروي

قصتي (وسوح السباع)

والنفط بالبصرة سلها

ابوكفتي ياهو الشجاع

ومنو كبلي البالسكاير

والسكك خط ابيراع

وارجع التاريخ اساله

وشوف ياهو الاسمه شاع

وبعد ...

وبعد كلي ترى دكلها

اشلون خطينه الشراع

وعاود التيوان سلها    

الباغي من حطمله نبره

ومنهو جان ابقوة ثاير

  ومنهو

وانتفض يحجي بضميره

ومنهو قد ملك اضاحي  

وسجل باسمك مصيره

*****

وسدة الكوت وجرفها   

ورجع اسال واستبشره

وكلها ياهو اليكللي ناضل  

وانطلق وتشده غيره

ياهو حققلك مطالب وياهو سوالك عبره

ياهو كبلي، وضحى كبلي

ونزل للشارع يناضل

وياهو مثلي، وصمد مثلي

ونهض لحقوقك يقاتل

سته وثلاثين سلها     اشلون قانونك تشرع

منهو بإخلاص وحميه   الجاهد ابدمه وتبرع

منهو لو نفيونه لجلك   لملم اصنوفه وتطوع

منهو يموتوه ألف مرة   لا تظن للطاغي يركع

***

ومنهو كبلي شما يحزون ابركبته ابسرعة يرجع

ولو يقسمون ابمماتي هم اخضر وارجع انبع

وحتى لو جزمو فنائي   ارد ردود اعشعش وارجع أسرع

ولو لو بعد نكسنها نكس هم أحطمه ولسمي يخضع

*****

اعكيليه..

وانا اشما رادوا يلووني

اشما رادوا يغزون امجاني

اشما اسمع دكه لجاكوجي

ورنتها ومنجل نخياني

أتذكر ثورة البكتوبر واترنم بالحزب الباني

*****

وآنه وآنه

آنه اول من يضحي   ويعمل وما يستكين

وآنه ضد المرض طبعي   واحمي مثل البنسلين

وآنه كلما يحشوني   انبع وعركي دفين

وآنه بفراحك أغنى   وحتى لو كلبي حزين

ودوم لجروحك اداوي وجرحي يشفيه الانين

وآنه انته

وانته آنه

ولكنه.. كلنه ربانه لينين.

عرض مقالات: