الگمر منطي اسم سيد الكياسة
الحزب ..
طبعه مميز من اساسه
رسم خطوة فجر من صُبح آذار
ومن فكرة (فهد) فصل قياسه
الحزب خده ورد ينثر نفايف
وغبش صبح النده من خده باسه
تره طبع اليحب من عشگه معروف
يذوب العطر من شهگة انفاسه
وحبينه الحزب حب المجانين
وعلم حب الجنون أصبح دراسة
شوصفك يا حزب .. تحتار الأوصاف
اذا انوصفك ذهب تزعل الماسة
الحزب ... يا سائرون الشمس والماي
اليزور الحزب يعرف طبع ناسه
الحزب مو مثل وعاظ السلاطين
ياخذ شوره من سوگ النخاسة
الحزب..
صاحب قضية وعنده تاريخ
وّبياض الشيب تاريخ أعله راسه
الحزب (لگمة) شرف وبحلگ جوعان
وتاريخ الشرف عنده قداسه
الحزب .. لو رايد السلطه مثل هاي
سهله السلطه چانت والرئاسة
انا وعكازتي.. النتوچه عالگاع
نصفن عله الغشمه البالسياسه
آذارك ربيع وعيدك افراح
يا احله الشعر باروع جناسه