الگمر منطيه اسم سيد الكياسه

الحزب .. طبعه مميز من اساسه

رسم خطوه فجر من صُبح آذار

ومن فكرة (فهد) فصل قياسه

الحزب خده ورد ينثر نفانيف

وغبش صبح النده من خده باسه

تره طبع اليحب من عشگه معروف

يذوب العطر من شهگة انفاسه

وحبينه الحزب حب المجانين

وعّلم حب الجنون أصبح دراسه

شوصفك يا حزب .. تحتار الأوصاف

اذا انوصفك ذهب تزعل الماسه

الحزب ... يا عين الشمس والماي

اليزور الحزب يعرف طبع ناسه

الحزب مو مثل وعاظ السلاطين

ياخذ شوره من سوگ النخاسه

الحزب..

صاحب قضيه وعنده تاريخ

وّبياض الشيب تاريخ أعله راسه

الحزب (لگمة) شرف وبحلگ جوعان

وتاريخ الشرف عنده قداسه

الحزب ..

لو رايد السلطه مثل هاي

سهله السلطه چانت والرئاسه

انا وعكازتي.. النتوچه عالگاع

نصفن عله الغشمه الـ بالسياسه

آذارك ربيع وعيدك افراح

يا احله الشعر باروع اجناسه