ماخذني المطر .. والخوف

غيمه إتجيب غيمه

وتايه .. إبوحشة غيابك

والشته گرب يجي ...

وآنه إبغربتي والسهر

وإنت ماخذ نومي كله

وتارسني بچي

وطيوف كل ليله ...

اوگفلك عله الشباچ واتنطر

او وي روحي اسويلك مواعيد

وعرس ودفوف

إمحضرلك حچي ودموع

اشكثر بيه بچي ...

إبگد بچي الشموع

ردتك الثلج الشته ..

موگد دفو إيطفي البرد

راح اطش سنيني كلها

بلچي بيها اللي ينفعك

بلكت إتغيرلي طبعك

ضاگ بيه الوكت كلش

وتعبت إشبابيچ روحي ..

إمن المناطر

آنه كل يوم من اصليلك فرض

تكثر ذنوبي

آنه بآخر شوط ...

واتنطرك غيمه

حته لو مرت عليه إبلا مطر

گمت اشوف الدنيا بيك ..

إشلون افرغص روحي منك

گلي .. وين إتريد بيه

اليادرب واليا نويه .

وآنه تعبني الوكت بآخر ايامي

عايش إبطرگ الاماني ونص گلب

إمغيمه روحي ..

سنين ماضاگت مطر .. يطرد الوحشة

چنت احسبك غيمه .. يغسلني مطرها

شفتك امغيم صحو ...

وابدفو شمسك غفيت

انت ليش .. إبآخر ايامي إجيت ..؟

ليش إجيت ...؟

وآنه صبيرة عطش بآخر عمر