چنت اظنّك
چنت أظنك ...
من تجي .. اتبلسم جروحي
إتطفي بضلوعي الجمر
وتهيد روحي
سنين تانيتك تجيني
وجيت بوشالة عمر
شكثر حسدوني ...
عليك الناس
وماعرفوا البيه
وهاموا ابشباچ حسنك ...
مثل بقصم ..
ذايب ابچاي العصر
إغتاضوا العذال ..
من شافوا فرح گلبي
غميج
ردتك .. اتشوف العذاب البيه ...
گبل الناس كلها
ردتك إتكمل الطريج
لا إترد بيه الحزن ...
وتعوفني ابنص الدرب
وتشمت العذال بيه
بعد مابيه سهر وهموم
وفراگ وغرب
آنه عايش ..
لأجل حب الناس ...
وتحقيق الاماني ..
إبنص گلب
شوفني .. وظلت إبكيفك ... بعد
نصطلح .. لو نفترگ
للدوم .. وضحلي الامر
****************************************
شلون ألمّك
مأخذ وياك السفن …
والسفانه والبوصله
وخشبة السكان بيدك
وتاركلي بحر مجنون كلش
والموج .. وآنه بلا جرف
والگيش هم وياك أخذته
ليل يعبر ليل والدنيه ممطره
إبوحشة الغربة عفتني …
وسافرة .. وبلا وداع
سنين تانيتك تجي
حنيت بابي .. وكل شبابيچي
وناطريت … هلال جيتك
مثل عيد الله الچبير
من تسافر .. مدري شيسافر بروحي
مدري ياهو مني يزعل
مدري ياهو .. ايطشني بشليلك خرز
گاعد ابوحشة غيابك خوف
ودموعي مطر
وانت ليلك فرح وشموع …
وسهر كاسات .. والباقي سفر
امگابل .. آنه وحزني والشباچ
حته الكاس مل من السهر
خايف أبيا لحضه اجيسك …
خاف افزز نومتك من أشتهيك
حاير .. شلون أدور عذر …
ويغفرلك غيابك …؟
نوبه ألومك .. نوبه أسامح
نوبه أعاند .. نوبه أصالح
نوبه أفديك إبحياتي ….
نوبه أزعلنك … وأذمك
وانت چن زيبگ مراية عرس
وذاب عالدوشگ ورد…
وشلون ألمك ..؟
***********************************
زهيريات
سافرت بشطوط ما گيش بها خاطري
وماگصّرت بالوفه وأديت حگ خاطي
لا تضن جبره سهل من ينكسر خاطري
حيران مدري شاشيلن من رفاتي او شخل
ماخله بيه الوكت نفذه أو شخلني شخل
أبتأس لو راح من بين الرفاگه شخل
مثل التلاحين طاريكم على خاطري
گضیت عمري أتابع ضعنهم وأبره
چالخیط صرت ألضم بفراگهم وإبره
رادوني بلكي أشت عن الدرب وأبره
عاندت مثل الصگر بمعانده ينزار
جرح البگلبي كلف ماضن بعد ينزار
والماثبت شارته لا تعتقد ينزار
أو لتصدگ إبغير حبهم أشتفي وأبره
راح أو نساني الاوده أو طولت راحته
لاتضن كلمن طرب من فرحته أو راحته
بسكوت تطحن يخي حدر الضلع راحته
من حيث هم الگلب زاد أو تعده الحد
سچین طبعي صبور إشما ولاني الحد
وأشما صدودك كثر آنتظر لاخر حد
من يعتگ الراح تکمل نشوته آو راحته
طشينه كل الوفه إبگاعك ولا شي نبت
وإبكل ضروف الوكت إنته ألي عنه نبت
ولو گطعونه وصل لاتضن بالسر نبت
ماعون صبري إنترس من كثر ظيمك ترس
صدگت حچي الردي وأمنت بشچم ترس
و إحسبت كلشي ولا يمهم سفنه ترس
بس گبل ما حسبت حبك أبگلبي نبت
************************************
حاير
حاير ...
إبيا لون ..؟
وبيا فرشه ارسمك؟
حاير ..
ابيا إيد اجيسك
واكتب إسمك؟
حاير .. وروحي إتكتّ الوان
يالون اليلم اوصافك
ويكتمل رسمك
إبيا معاضد يا محابس
يا طعم ينشاف خصرك
راح ارسمك...
مثل نسمة صيف
مرت عالحدايق
وذاب عطرك بالورد
وشلون المّك ..؟
خاف ياخذني الوكت
واسكر واخسرك
لا يهمك ...
راح ارسمك ...
حلم هدوة ليل
وبتالي العمر
وبروحي اظمك
لا يهمك ..
************************************
أبوذيات
إشكثر عثرات لاگني وعديت
وحسبتك توفي كل تعبي وعديت
ترس إذني إسمعت ذمك وعديت
وگلت بلكي بعد عندك حميه
إهمومي مثل موج البحر ما جن
وتنيت إطيوفك إمنسنين ما جن
أو سماني سفيه العقل ما جن
أفرفح وإنته بس إتلوم بيه
ردت فد يوم أنصحك وإنته صاحي
أو أبد ما خذت شوري وإنتصاحي
صفه معثوث جسمي وإنته صاحي
إبعسل شفتك إيدب السكر بيه
الوكت غدار وسيوفه سناها
ونارك سهسه إضلوعي سناها
الناس إبكيف من اتمر سناها
وأنه بالنايبات إتمر عليه