ياشباج ..
يمطوگ ورد و وعود
ماشفت التریده الروح
لا ذاک النسیم الجاي
سولفلك .. عليه يعود
تدريني ..نذرت دموع ..
والبرده اشتهت وجهي
وشرتني خدود
من يمته .. واگلها يعود؟
وتگلي النذور الماتجيب الراح
ليليه عليش تزود ؟
أگللها الوفه ..
ينشاف سالوفه
وترید .. شهود
واگلها الشوگ ..
من یعتگ براس الناس
ساعتها البچي مريود
ساعتها الدمع مريود
يا شباج ..
والشجره الهجرها الطير
تبقه برف جنح فراش تتحلم
واحنا بلا اساميهم
نضيع مناشد ويه الريح
مانلتم
نظل يم باب .. كل صفنه
نفل .. أعمارنه شراعين
بلكي الصبر ... بي مرهم
نشد صدر الستاير
والحزن ندريه
جدام الدموع البيض يتشيم
واحنه بغيرهم تهنه
وصعد بينه العتب هيبه
ونزلنه بشوگ .. ترس الدم
صرنه من الوجد
لو جبنه طاريهم
نحس بالضحکه تتیتم
وعلى طاري اليتم
روحي گضت
خطوات تتعثر
گضت رحله .. لهمس ..
بین انتظار ..وخوف
درب الامنتله تخاف يتعذر
لو وجه الخرايط ..
هم تخاف يخون
لون بلون يتغير
وانا بروحي
حنین الما تعرفه النوگ
لو بیها الوكت قصر
حرت جا بیش اداويها
وغناوي بريجي خدرانه
ولحن آه .. اعله المگير
صعب يوداع المگیر
نسه (لزامل) نبض بینه
وعتب فوگ الگلب .. خضٌر
صعب نشعل ثوانينه
وندخنها جگایر عوز
عالمامش
صعب لف العمر دخان
بشفاف الکواغد ..
ینذکر هامش
یاشباچ مو چانت
عناوینه ... امان ایام
هسه بدونه تستاحش
یا شباچ ... طر زیج الستاره
ولنك بشاره
وعلى جناح الحلم غابش
مو تدري استحينه
وخجل حتى الجام
خلگه النه دهر فارش
هسه احنه ..
گضیناهن سوالفنه
ورجاوینه اعله ردتهم
بعدها موزره تكامش