باقة ورد
امغلفه ود او محنه
او شوگ
وابفرحة عرس
فيروزي العطر
يرد الروح
و ايريح النفس
تحمل ورد قوس قزح
كل لون پيه
او كل جنس
ورده بيضه
او ورد حمره
او ورده مدري
شنهي الوانهه
اتطشر ونس
اشروگي ٠٠٠!
چن زفة عرس
صوت الغنه
البيهه همس
اتمازح انجوم الفرح
چوبي الرگص
طبعه ردس
بالطيب للوادم وفه
أنطت درس
والما يحس
لازم يحس
اشروگيه احنه والنعم
عزة نفس
ترچيه تتمرجح غوه
اتمازح أخدود الگمر
ابكل الصدك چلماتنه
تتعطر العشگ نسماتنه
بينه الوفه ينضح وفه
من شوگ أمس
الطاهر حليبه
منه بينه
نكره ابو طبع النحس
مجبولين اصلا عالصدگ
طاري الجذب عدنه (نجس)
اشروگيه أحنه او نفتخر
احروف اسمنه
ابكل زمان ابكل مكان
أبكل كثر
علم شايل نار
والوفه النه شعار
گول او فعل
اتطبعنه عالزينه نعم
بالشينه ما النه شغل
أسال التاريخ والتاريخ
شاهد عالحقيقه
او للصدگ طبعه سند
حسين ارخيص منه
او منه فهد
او منه ابو الچون او حمد
اصويحب او شمران منه
او نزيهه منه او منه الصعد
عالمشنقه او غنه
(هزينه الموت اوما هزنه)
او منه بعد
عبد الكريم ابو ادعير
اتصفح التاريخ
بأفعاله شهد
أسال احزيران عنه
ابثورة العشرين
واتنخه الشباب
الضحوا ابتشرين
زلم صعدوا أچتاف الموت
موش افلان لو فلتان
وين او وين
ارنقوا درب الشهاده
شوگ ٠٠٠٠!
من درب الشهيد حسين
يشهد أذار النه
او هم يشهد تموز
غنينه ثورتنه حنان
ابصوت فيىروز
قداح طشينه الليالي
ياسمين او رازقي او روز
اشروگيه او قوس قزح
بيهه او طبع باقة ورد
بيهه الورد من كل جنس
ترد الروح ريحتنه
ترفه او تعطر
كل محب عزة نفس
ترفه او تعطر
كل محب عزززززة نفس