وكـأنَّ الـدروب بـلا نهايـات
مشـينه... ابنگـبة الجـناز
مامـش للدمـوع اجـروف
مشـينه.... والجـرح عريـس
يضـحك والمـلح زافـوف
وذنـوب السـوالف حــوت
تبـلـع واهـس الملـــهـوف
اثـــاري العـمر سـفرة طـيف
من غـمّ العمر لوصـار بـس اطـيوف
وغُـبَشنَه ابطـيحة النـجمات
مـدري الياضـريح انريـد
چـنهه ابلا هَـلَه العـنوان
چـنهه اشمـوعنه ابلا خـيط
والديـره ضـواهه ابعـيد
وعُـبَرْنه امـعانَد وي الريـح
والخـطوه نِـفَس شايـب
نِـفَس شـارب صـبر وكـته
اعـله ريـجه ايـصيح :
يـدلال الچـوادر مايمـرچن عــيد !
يهـلال الجـنايز ماتـچل وتـهيد !
مامــش للـفـرح دكــان ...!!
مامــش للـفـرج ديّــان ...!!
لا ضـحكه ابـفـجر نـــيسان
تـشــــــبگ نـــجمة الماشـــــيـن
لاعًــثرَة هَـــــلَه ابفانــــوس
تحــضن چــــفّ المـــــــتيهين
لاحـنّه اعـله خصـر اللــيل
تشبـــــگ نـعــش المـعرسين
ورگصـنه ابنـص نــــهر عـطشان
نتغـاوه ابگلايـد طـين
يابــــويه.... مـشينه اهــــواي
يابـــويه... بعـــيــد الــمـاي
يابــويه الســنين اركــاض
مايــمشي العـمـر بــهداي
فَـر بينه الخـلگ ناعـور
نتسـلَّه بنـعاوي الــراح
وتـهــزنه غـناوي الجــاي
حتـه العطش وكـت المـوت
يِجـــفِل من زراگ المــــاي
ويلـمنه التـعب مــوال
ويـرد الصـدى اعـله الـگال :--
ماغـنّـه الگـصب بالــهور
بــس جـــور الذبــح مــرّات
يِــشتِل بـحِّـته اعـله الــناي
ولگـــينه الــواهـس ابـلا ســاس
وســروج الصــبر تــيزاب
تــشرب مـن صـديــد الــكاس
فـرَحــنَه ... ومالگــينه ابتــوت
عِـشَگـنه .... وماعـثرنه ابـــناس
غابـه وكـــل شـــــجر نعــسان
مشـــكول اعــــله ذمــــة فـــاس
وجَرَعنـه الفـزَّه جَـــفلَة طــير
من شـاف الطُـــعم مغــــشوش
بعــــــيون البيـــادر ذِل
وكرهـــنه امسامـر الحلــوات
مـن خانَـت سـواني الـــــخِل
ولا مُهـــــرَة بخــــت تشتـاگ
يطـرب شوگـــــهه و تِصـــــــــهِل
يخـرسـه اتگــــود بـينـه الويــن
لاتُعـــــبر ولاتــِــــــجِفل
أثــــــاري الصــفنه صحـــوة مـــــــوت
تـــــضفر بالظــــــنون ازلــــــــوف
اثــاري افراحـنـه ابـلا كــيف
والســكـته تـــدگ ادفــــــــوف
مــــــشـــــينه.....
والجـرح عريـــــس
يضــحك والمـلح زافــوف