منو مثلك
يالمطلگ المناصب لجل حب الناس
زعيم وخادم الاهلك …
يمزغر الصور ومكبر الصمون ….
ما ينسى الضمير العدل ضي عدلك…
ياضحكة الفقره ودمعة الطاغوت…
صعبه تموت يالتاريخنه يجلّك ….
منو بحلّك….
يا قصر الصريفه وبالسمه نجمات نرسملك….
وزنّه القيادة من زمن هارون
يا قائد وصل ظلك…
وجرّبنه النزاهة بحقبة الماضين
شو محد گدر ياصافي يوصلك…
رادوا يوصلون المئذنة طاريك…
وصلوا بعض بعضك مادروا كلك…
منو مثلك…
شجاعة وتشهد الجبهات
بغزه شگد الك صولات تضحكلك…
شهيد بلا قبر لا مال
بس شعبك شچم تمثال
حي بگلبه ناصبلك….
يلماتمل حب الناس حب الناس ماملك..
الزعامه بس عليك تلوگ
وسفرطاس الشريف انذار لهل البوگ
وكل هم الغدر عزلك…
عفا الله شو گلتها أزماط…. وتدري محد يگلك…
وعفيته بكل رحابة صدر يالتدريه باچر يامر بقتلك…
لا ثروة لصوص ابليس
طاهر رافض التدنيس
روحك أرض يا عريس
والفضل اليعيشه الشعب من فضلك…
يا عرس الفلح يا نكبة الإقطاع…
يا ضحكة بساطة بوجه المزعلك…
يادمعة فگد ظلت بعين الروح…
ماترضه المروه ارواحنه تهلك…
لان ما مش بعد مثلك…