الناس
مرة سألني الثلج عن حالتي وگتله: بردان حد العظم
ومره سألني الصيف عن حالتي وكتله: محترگ حد الجلد
ومرة سألني الورد وجه الربيع الندي عن حالتي وكتله : مثلك ورد روحي
ومن خاطر بلعبته
وهز حلمي من غفوته
وبوجه شاحب اجه واتلوّن بورقته
گتله حبيبي : السمه تعشق ومضها
واحنه
بخريف العمر
الناس البعضها !
صورة
وجهي حزن قافله
مابين بصره
وشام
ضاعت
ويمكن تجي
لوما تجي
وتختفي
اتبيّن
مع الايام
ومحتفظ بيها بشكل صورة زمان الخشب
ع القالب
مجوّمه
ومكسور بيها الجام !
إطفاء
روحك طفت بالندى
مو بالمطر والماي
ها گد جمرها خفت
يطفه
ابنداوة نده
مو بالمطر والماي
هيّ بچت
من طفت
لو من طفت نادت:
يانده طفيتني
من شفت جمري وضع راسه على المنقله،
حس بالتعب وانكمش من الانتظار ونام
والهوا بارد اجه
شال الرماد ومشى وتعرّت الايام
وبان الزغر بالجمر
يكفي نده ايطفيه
ليش المطر والماي ؟
يانده
يشتاق الك
ورق الشجر والورد
والعشب
والاحلام
جفت على عيوني
وخايف حلمها ينام