بين اهنا او بين اهناك
أو بين الهله و اللا هله
أو ما بين الف حيّاك
جبت عمري اويه وكتي
هاك لا هناك
او بين الأدري او الما أدري
تاهت الأيام بي او تاه عمري
او ما بين نهران الدموع
او زرگة التابوت
انكسر جنح الحمام
او سكته مات الصوت
ارتفع صوت النواعي
والفرح بسكوت
احلوگ المگابر موت
ينگل موت
ابنادم صار يونس
والليالي حوت
تعبت الحيطان
من كثر اللافتات السود
عليش؟ او ليش ؟و اعليمن؟
الناس اتموت
سؤال إبلا جواب
او خلهه يم الله
هوه الله خلقته
عبث حته انموت
جا المن خلق دنيه أو آخره
او هم خلق جنه او نار
او سراط
او لازم عليه انفوت
جبير الله الخلل بينه
ذنبنه منه و اعلينه
عملنه الشر
هجرنه الخير
ربينه الصگر
ونريد يكثر طير
الوادم بين ذيچ او هاي
هاي اوذيچ
بيضة ديچ
گبل گولة نعمهه
بسمل المليچ
دنيه إبلا خجل
وانعيش بيهه اشلون
تشبه صلاة الكاولي
كل ساعه الهه لون
يطربنه الحزن
والدمع كت أعيون
مشتاگ خنيب عالوجن
ماتت ابسده اجفون
دنيه امسودنه
او بيهه الوكت مجنون
وادم فاگدة التفكير
الخلل بينه
امتطينه ابشوگ درب الشر
هجرناه ابعمد
مقصود درب الخير
ربينه الصگر
ونريد يكثر طير
اشلون اويه الصگر
يا ناس كثر طير