اخر الاخبار

 الى الرفيق الشاعر والمناضل

عبد الرزاق كميل (ابو قمر) ..

لقد كان رحيلك صدمة أدمت قلوبنا

ـــــــــــــــ

رحيلك جان صدمة وعثرة ارجال

وتفاركنا  وتغيب ابغير صدة بال

موش احنه نعرفك بالشعر مهوال

اشلون تعوفنه وساحات التظاهر

بيها الك تمثال ؟؟؟

فراكك جان مو عل البال

لأنك ما عفت دربك... هاي  حفنه أجيال

تركض بالمناشير .. وترفع راية العمال

تفاركنا بهل السهولة ..بلا  وداع

وأنت قائد بالنضال ...؟؟؟

تظل العيون تربي ...

وما نكدر نعزي .. وننطرك خيال 

دوم اتمر وبيدك ... كضبة حجايات

تنثرهم بدربك .. موش قيل وقال

حجايات المسيرة .. وعثرة الماشين

والجلمات تكبر .. والحزب  ما مال

ثابت على المبادئ ... ما  تهزه  أصوات

ولا تثنيه  عثره .. والرفاكه  اشبال

وسفه اتعوفنه بلايا وداع

ولا  نسمع صهيل احروفك

النشم بيها عطر عريان والنواب

ووسفه اتغرب  وعطر النفس مخنوك

واحنه بلايه صوتك سادين الباب

اشلون أنسه  القصيدة وجلمة التاريخ

مزروعه بسفينة روحك الغركت بخنياب

شتظن ما يعتنينه اخيالك بأحلام

وتمر بينه ونشوفك  وانته بعدك شاب 

لكن ارد  أنشدك  عن سنين اشلون

مرت بيك  وهيه من العمر واصعاب ؟؟

وندري بك  محزم تنحر الكلفات

ودربك حيل أظلم .. والسبل عثرات

وجنت تتمالخ وي الضيم

واسنينك كضت لوعات

الف وسفه خذاك البين

وأنت الجنت بيرغ  حمر ،

يتحدى .. يرف عالي .. ويعبر سجة الحسرات

مشهوده  الك  يالصاحباك  الضيم

هاي اسنين عبرت .. وانت وي الموت

تتعارك معارك ما تصد للفات ..

مودع يا كمرنه الغاب ..

نظل نمشي ابطريجك ننحر الطيبات

ونظل ع الدرب نمشي ... وننحر الكلفات