ورش المواجع بالوطن
ورشه تطگ بورشه…
مشيعين ليلك ياغضب
والصبح كحّل رمشه…
ومو كل شعر نقراه شعر
بعض الشعر كالممشى…
شايف خجل ما يستحي؟!
سامع فجر يتعشى…؟!
ومو كل رسول اصبح نبي
ومو كل ضريح ندشه…
ولا جار امس مثل الذي
عنوان بابه الحرشه….
موفق هلاهل كل عرس
جكليت كلنه نطشه…
باليمن ومعاشر حسن
شهگة الطير العشه…
چنك وطن يبچي وطن
مو بالدمع بالدهشه..
مالوّن اشعارك مدح
ولا مشتهر بالطشه…
آنه من اوصفك بالشعر
النواب ويه الأعشى…
والگاطع يغازل بدر
وعريان يلقي بعرشه….
يالمنطي لصوات الحكم
والظلم إذن الطرشه…
وراكب على مهور الشعر
سوده ويبيضه وبرشه…
يموفق بوجه الطغه
وفاضح لعبته وغشه…
موگلت لابنك من رحل
آنه گبر يتمشى..
گوم اعلى حيلك يانفل…
وبالشعر شطَك رشه…
والحله من غيرك تره
ليلتها كلش وحشه…
وطيور شعرك يا ترف
عالگبر حطت غبشه…
موبس بشر حتى النهر
مكسور يمشي بنعشه…