الشاعر من يموت
ابحزن تنعاه القصيده
او مثل ونة يتيم
ايصير تغريد البلابل
او گبل وكت الحصاد
الروسهه تحني السنابل
والقوافي٠٠!
لبست اثياب الحداد
او بالرثاء
اتگطر الحسره مشاعر
مات شاعر
واي شاعر ٠٠٠ ؟
مات صوت الفقره
والام السنين
مات عراب المحبه
النازك الناي الحزين
شهگته حب الناس
چان ٠٠!
او حسرته تكتب خواطر
ابهيد يا شيال تابوته
اعلن هونك
خلي شط الحله
بقره الفاتحه
لا يظل مكسور خاطر
ابهيده وياه
ياحلوين اليهامه
تره بالتابوت احلام اليتامه
و بيه غصن زيتون او حمامه
ابهيده لا تكسر جنحهه
ابهيده لا تذبح فرحهه
ابهيده وي موفق ابهيده
تره مزفق ترف
احديثه او مايل زلف
روحه قارورة عطر
او حسچه او موال
او محنه ٠٠!
بيه يتباهه الشعر
روحه ورده
بيهه يتباهه الغصن
ترفه وتحب السمر
اگليبهه ينبض قصيده
بالعشگ كلش جديده
بيهه حريه او سلام
او بيهه ثوره
بيهه شوگ
او الف ذكره
تتغنه ابحب الوطن
اتغني العثمان
و أزاد او حسن
شوگ عاشگ
خلگ شاعر
بيه يتباهه الشعر
چلمته اتسطر خواطر او
موفق والشعر توم
حلم گلبه
موش بس لليوم ينظر
دوم كل عينه على باچر
موفق أيقونة شعر
ما يكفيه اسم شاعر
مات من بعده القوافي
حايره او تكسر الخاطر
تگعر ابصوت اليتامه
مات صوت الفقره مات
و انكسر جنح الحمامه
والقصيده ٠٠٠!
اتلوذ بالتابوت دمعه
اتلوذ مكسورة الخاطر
والشعر من بعده حاير
اتگطر اوزانه حزن
اينگط خواطر
ترفه مكسورة الخاطر