من

شجْرَه

الغصن

وايطيح  .

روحي امنين اجتهه الريح ..؟! .. 

لا ياموت  ..

حسبالي يِرد

بالعافيه اتلكَاه ، طاير ..

كَبل

اصابيعي

الرموش

اِلشوفته  اتصفّكَ  .

هسّه

ايامي

 مركونه اعله رَف الطيف

وادري الطيف

صورة نار بمرايَه ولا تحركَ ...

شلمّن

ياكتر بالجسم

والكَالَك أثر ليهسّه ما مفطور

وحشة

مغرب  ............. - ،

او بستان مهجور ...

حزنك ..

حزنك ينقرَه بالروح

واليقرَه الحزن ..

بس  بالوجه  مابِيه  روح

حزن

الروح

محفور ابنقش خَط لوح ../

ما ينمحي .. طوفانك جزيره اوكَيش يانوح...

أبوك

ابصفنِته

چنّك طفل ردّيت

واسنينك حسبهه ،

ابدمعه وحدَه ابطولك اتعدّيت

كَزاز الشهكَه من عدّيت ..

وامّك بالنعي

اتهز حايط الجيران كَبل البيت ...

رِدت

اشوف

اخطوط

وجهك

علَه

 وجهي

ابيا اتراب املوّنات ..؟

اتغامزن أسوَد ابأسوَد

سودَه كلهه ابوجهي المرايات ...

كل كتر منّي يجيبك رجفَه رجفَه ..!

شجْره

وحده

ابطركَ

سعفه

انت َ نسمه او

رِدت افوج ابهبّتَك والشبكَه ترفه ../

كَلت

اشوفك

بالصدر

كَطرة حليب

اتلولي بِسْمَك ، ما نست ، واتكَول اعرْفَه ..!

رِدت اشوفك

كل

سنه

ابضلعي

شَتِل شامات  تغفَه .

مادريت

افراكَك امشامر مُدن والموت صدفَه ...

ولا دمعي ..!

ولا غلطان ما أعركَ ..!

اَصابيعي

شفتهه

ادموع

اَجيس اخيالك او اغركَ ..!

وين الكَاك ..؟

لو بس شوفِتك بالمصعد المهجور

حتّه

ابخوفك

اتعلّكَ

وين الكَاك ..؟؟

غركَان ابأصابيعي .. بعيد الكَيش

يل طولك جرف ../

عالي

الشمس

بيه الروح كَبل الجسم تتمشركَ ...