كُون الِم ذاك العطش كلّه العطَشْتَه
وبچي شطّين ابحظنكُم
كُون الِم ذاك الحنين الجازي وكته
ورتوي ابزَخَّة مِزَنكُم
وكون بيّه..... ايدور دولاب السنين
وبلچي ارد خيط ابغزلكم
هچي واطّشر سوالف ....؟!
هچي وتلفني المغازل واغزل اظنوني ولمكم ..؟
ياهلي ...ابكل صوت خايف حشّمتكُم
ياهلي ...... ابكل طور نايل دورتكم
ماني احبكم
ماني مشتول ابدربكم
ماني معذور من اذِم طور المعاتب
خاف يطفح غيض البگلبي وذِمكُم
ياهلي...... ومامش بعد سَلْوَه التِسَلّي
ولابعد....مثل الگبل حضن اليهَلّي
وتاه ظلي....
وشحَّت افراحي وعزِتكُم
وانه ذاك الماتبدَّل طبع طُوره
اشما يِهِب عطر الطُواري
تحير روحي.... ابيا كتر يحبابي اشمكم
ياهلي...... وحنَّت علي وادم غريبه
وصاحو الميت غريب.. امنين هذا؟
وشالو امن امتوني نعشي
وچانت الفشله صديج
وچانت الدمعه گرابه
وچانت السكته حبيبه
ومادريت الطيف بالغربه عجارب
يظفر ابدمّي گصيبه
وانه طير... وحمل البجنحي ثجِيل
وغيمة المابيهه مطره...
الگاع مايعذر عطشهه والصبر بيهه ذِليل
واختلَط لون الصدگ ويّه التراب
وفترگ طبع الأثر عن الدليل
وضاع صوتي
وطفح هَمّي
وبيّه ناعي الغربه صاح
( امنين اجيب الجابته أمي )
والسوالف خضّرن بُرعم جديد
وطگ غصن حلمين بيه... وفار دمي
الدمعه جمره... وصفنة البيّه كواغد
ياهلي ومامش بعد زاجل يوافي
حتّه اصوغ الكم رسايل
حته اطرّز جرحي بخيوط القصايد
ياهلي.. وبيّه الأمس رنّة جِناجِل
صابَحَنَّي اظنون متوحمه بهلاهل
چَنْ حِلمهِن حَنْ فخاتي وعشگ طير
الديرتي وضحكة ابوي
ومحبس امي وطولها وشذر الگلايد
ياهلي وفزّيت من غبشه اعله اسمكم
من قريت اخباركم دمعه ابجريده
گمت اشمكم رازقي ابحبر الجرايد
ياهلي.... وماظل طعم للدنيه يسوه
وحلفلكم ..... شوگي عن العام زايد
ياهلي .... وباچر العيد
وانه حاير ياهلي ابيا ثوب اعايد
وانه غير ارسومكم چا شنهي رايد
وانه غير اعلومكم چا شنهي عايز
وانه ذاك ... الصادگت كل الأطوار
المارضت بالعيد اغني
اشعندي اغني ....؟!!
وانه من جيل النعاوي العاشر ادروب الجنايز
ياهلي...
وصحره البروحي اتريد ماي
اتريد موال وتتن وغروب ناي
اتريد چادر يشرب ادموع الونين
ويكشخ ابلطم العجايز
ماني مشروع الحنين الخاوه چويات الخساره
وچنت اظن ابكل خساره الصبر فايز
بويه غير ارسومكم چا شنهي عايز
ياهلي..... وماظل بعد للشوگ خاطِر
من طُفَه اُوجاغ البخت واللّوم عاجِر
من شَخَص ناب العِفَه ابعين الملح
ياهلي ... وماظل بعد للدنيه واهس
حتى اشِدّ احزامي وارگص للفرح
ياهلي وبس اشتهيكم
اشتهيكم
سالفه ...
وخيط ......
وجرح