من يوم إحتلالك يا شعب لليوم
سولفلي السياسي إلي إجه إشقدم
نفس ذيچ البنايه الما علت شبرين
ونفس شارعنا ذاك ونفس ذاك الهم
وإجو ثوبين ثوب إسلامي بإسم الدين
وعلماني بأسم هالفقره يتكلم
وإحنا إبين هذا وبين ذاك الثوب
صبحنا عرايه وجسد خلص دم
دول فقره .. وبنت مترو اعله خد الغيم
وبعدنا إحنا بجسر مگرود وتهدم
وعبرتنا الشعوب بعلم وبتطوير
وأبد ما چن حضارة بابل الأقدم
وصلت بينا نحسد شعب موزنبيق
بسبب عقليه شنهو تريده ما نفهم
وإلا أحنا بعصر طب واحد وعشرين
وشعب يلزم سره إعله النفط المصخم
وميزانيته متأخره بسبب توقيع
والماليه بأيد الخال وإبن العم
وخلصناها من إثمانيه وخمسين
ولهسه إمنيتنه بعيشه نتنعم
ويا هو إلي يجي يخلصها بس تنظير
ولو عالشعب لو عالجار يتهجم
وشعب خلوك تتحسر على التعليم
إبوكت چانت دول من عدنا تتعلم
وقبلة علم چانت جامعة بغداد
الدرست علي الوردي وطلع منها أعلم
مـيّز ناسك وخلي العقل يختار
العواطف ذله من إتزيد ما ترحم
وبالك تنتخبهم من جديد إنوب
شعب خلوك عالطاغوت تترحم
صوتك هسه سيف وإفهم المقصود
وطن يردونه قوميات يتقسم
ما يدرون إذا ضاق النفس بأربيل
هوه البصره الجنوبي إمن الصبح يلتم
ويتحول إعذيبي إبريت كوردستان
وأبد ما يرضى غيره إبهاي يتقسم
المهم راجع حساباتك على التصويت
وأريدك من صدگ وياي تتحزم
ولو ما قصرت من علنــّو إستفتاء
سويت العليك وحتى لا تندم
وإستقتلت خاطر توصل الصندوگ
ومقابل هذا دخلوك إبنفق أظلم
تعبنا إمن الحروب وريحة البارود
كافي إمن السلام وخل ورد نشتم
باچر عشره عشره وثبت التصويت
وإختار العراقي الما اجه إملثم