لو دارت الدنيا عكس
إتصير ما تسوه فلس
لو رادت الدنيا اتدور
تساوي الصگر والعصفور
إتنزل الچانوا بقصور
وتصعد الچانوا مدس
لو دارت الدنيا عكس
إتصعد الما عنده علم
وتسوي الزبايل زلم
الشرف لما ينثلم
ما تبقه كل عزة نفس
لو دارت الدنيا عكس
شلون تقبل ياشعب
من بعد كل ذاك التعب
اعدائك يحوشون العنب
وابهل سهولة تنعلس
لو دارت الدنيا عكس
إيعلسونك إبلا مستحه
أهل المحابس واللحه
وانت اللي مالك مصلحه
إيهلسون ريشاتك هلس
لو دارت الدنيا عكس
إيخلونك إبلايه جناح
ويستخدمونك فلاح
إيسلموك خالي المصطاح
الخالي إلك وإلهم ترس
لو دارت الدنيا عكس
إلهم الصافي والخبط
وحصتك سكر والضغط
همه ايشفطون النفط
وتدفه انت بالشمس
لو دارت الدنيا عكس
بالشمس انت مكتفي
وصواب البروحك خفي
الشامت ابوضعك مشتفي
وإيگلك إيطبك حمس
لو دارت الدنيا عكس
إيطبك حريشي والمرض
الواقع إعليك انفرض
إمنل سرسري تطلب غرض
مو تدري بي سافل نگس
لو دارت الدنيا عكس
إتصير ماتسوه فلس