رِدْ بالطيب دلاّلي
وخذ منّي اعله ذاك الطيب دلاّلك
وَافُضْ نبض الشراكه اوياك
وَدْعي بكل مِسَه العباس يبرالك
ولا ظلَّن عُمر مسجون
خُوصَة سعف بْسلالَك
بعدْ ما بيّه ركّ الحيل
يلكلَّك شباب وعافيه احوالك
يغافي .... الشيب مَر جّناز
ونته ايعبّر الوكتين غربالك
عساك وي العساني البيه
والبيَّه وي مثل الصار يجرالك
شلك يمّي ؟! التريده انطيه
ولا غنّي عله بحَّة ناي موَّالك
صِدَه وزنجَر حچينه الفات
ذِمَّه وظل سحر معگود بذيالك
وحسدَه الما يفز بالليل
هنيالك يخالي البال هنيالك
ولا مثلي بكحل فنجان
يسگيني المراره ابفورة ادلالك
ولا مثلي السهر نيشان
منحوت اعله هدم الليل تمثالك
ولو... عمر الجزه الخمسين
ما عدَّل رِسْنَهه وسبُگ خيّالك
ولا انطر بعد شوّال
فك عاشور حزنه ابفجر شَوّالك
ولا صوم ونعدّ أيام
فارگنه النظر شنسوّي بهلالك
درد بالطيب دلاّلي
وخذ منّي ابسواة الطيب دلاّلك