صوت من تشرين
هادر
فرحه غناه الفخر
طيبه او شجن
طرز الأيام
(هيا فتوة للجهاد)
ابكل شجاعة
إبلا وهن
ابكل محبه
كحل عيون
الزمن
صوت غرد
فزز اعيون الوسن
رايد وطن
رايد وطن
مابيه طائفيه
او لا فتن
خالي من طاري الفتن
ما بيه كل
ريحة دم
ابنادم بيه
يعني ابنادم
كلشي بربوعه حسن
لا مصايب
لا حروب
او لا محن
رأيته راية سلام
طيبه ناسه
إبلا تراجع للأمام
أتغني ابحبه العنادل
أجمل واحلى لحن
رايد وطن
بيه شيرين
واسعيده او وسن
ايغنن سوه
ايغنن لمن؟
للعشگ
للحب
للوطن
ايطرزن
مشاحيف الهوه
عزة نفس
ايباهن غوه
عين الشمس
اترفرف
نفانيف العرس
هيبه او ونس
صوت الهلاهل
السمه
ما بيه هلهوله
همس
كلشي علن
رايد وطن
رايد وطن
بيه ازاد
وي عثمان يمشي
ابحسن نيه
إبلا عفن
او عمر بيه
ابصف علي
او ايوب
يلعب وي حسن
رايد وطن
بيه دم
ابن ثنوه مسار
او عمر سعدون
المنار
او حيدر القبطان
بيرغ رأسه نار
صوتهم
صوت لنتصار
خطوا ابدمهم شعار
ما رايد التعيين
لا رايد كراسي
او لا رايد فتن
رايد وطن