اخر الاخبار

الغربة هزتني .. وإجيتك

كلّش إمغيم  حزن

گلبي إبغيابك

سلّمتلك كل مفاتيح العمر..

وبعدك .. إمعسعس ليل

يا مطوّل عقابك

مدري ليش ..؟

أتخيلك شباچ .. وآنه إبسجن

وألتذ إبعذابك

إنته بيدر كرم .. للمگطوع دربة

وآنه سايل .. ذايب إمنلخجل

مصلوب إعله بابك

جيتك إمچلچل برد ...

وضلوعي تتراجف مطر

مشتاق أشم ريحة ثيابك

خرّبت كل العمار الچان بيّه

ولك .. يامحله خرابك

مشتهيك ...

مشتهي أرجع طفل

كلّش طفل .. وزغير كلّش

حته أحس إبهيبتك

وأحسب إحسابك

ومشتهي إتعذبني كلّش حيل

كلّش حيل .. وأرتاح العذابك

شوفني ...

ولك شوفني أترجاك يمعوّد

ولو مرّة إبحياتك

لابس ثياب الحزن للدوم ..

وإنته عدل بيّه

إشراح ألبس في مماتك ..؟

إنته ليلي ..ودنيتي

وعمري الخسرته

وآنه أتباها على الوادم ..

إبراحة بال..وأعتزإبصفاتك

بيّه سولة صبّي ..وإنته الماي

وماخذني الغرام ..

ليش يا شط الفرح تجري عكس

شنهو المرام ..؟

ليش كاتلني العطش

وعيونك إبروحي زلال

ياما صحتك ..إشكثر صحتك

وحشميت الناس..كل الناس

يمعوّد تعال

وما إجيت ...

ماإجيت .. وشمتت بيّه درابين العمر

والوكت سواني محطّة إبلا قطار

 وما إجيت..وخلص كل عمري إنتضار

تردس إبروحي ردس عايل ..

أوتتبختر دلال ..وآنه مجنون إبحلاتك

مثل ميّت عشگ..محتاج الصلاتك

آنه .. مثل أمراية بالظلمه ..

ومحتاج الضواك

إتريد أضويلك عشگ ..؟

لوأطفه وحدي

هاي مرهونه إويه ذاتك

مرّة حذّرتك إتعاشر ليل ..

وإيجيسك ندّه

وإتصير لذّة عسل بيّه

وأسكر إبمزّة حلاتك

آنه ودّي إتضيع ويّه الورد

نسمة ليل ترفه  ..

حته أضل محتار 

إنته الماخذ إمنلورد خدّه

لوهو ماخذ من صفاتك

ياحلاتك .. ياحلاتك

وياحلات العمر لوضل دوم

محتار إبصفاتك

عرض مقالات: