عندما تحتضن الوحشة سنابل الذكريات يتدفق شلال الحنين في انهار الماضي

ردني أردود

خليني آويه جرف اسنينك ألبي عشّب النسيان...

قوافل للحنين اوروجه أللهفه..

التطوف أبسورة أظنونك صبح وتزود

علمنّي أشاكف من يسدّي الليل...

ويورّد أبباب الذكريات...

أللابسه امن أسنين ...

ملابسها العتيكة السود

ردني امسنبله أيامي ...

عذابات او فرح كل باب بي مسدود

زتني أبكل مداراتك...حراثي الخطوة أجدامك...

طبع وحشة أو صبر صايود!!

وديني أشر دمعات عيني الماتريد أتغيض...

على أخيوط الصبح بلجن...

ينشفها شعاع الشمس من أتعود

رد بيّه مطر رغبة او سحابة طيف...

تمطر فوك جفن الطين ...

وتوعي حلمها الظل ترس روحي...

جنح ممدود   

ردني أردود

ياأخر مسافة ابسجة الملكة ...

الطفح فيض التعب بيها

اوجدم مآبي سفر موجود

حزن روحي سمه أوكل نجم مامش بيه ..

بس بيه الأمل دنيه بلايه أحدود

ردني أردود

فيض كاع غدراني ...

اليون مجروح بيها الطين

اغسل ليل همي السافر أبروحي ...

النهايات العمر جرفين

رد بيه حلم شبكات للملكه ...

اوسجج للشوف مابين الجفن والعين

ياشجرة سكوت الكل وركها أسنين

طشرني شعر يشرب بواجي الناس

وبليل التعب مشبوح الك مهرين

هاك أتصفح أظنوني ...

منارات الوفه أبكل حين

يامجرى الرياح الما الك جرفين

عتك بيه الحلم ردني ...

اونشف ماي القناعه اوخلكك أبساتين

على افياي الوسن عيني ...

خيال الها غفه امن أسنين ...

مصباحي عتيك أوكل رمح للنور ...

ماغرز أبصدره أو لا شتل بي عين

يامجرى الرياح الماسلك جرفين

كطرات السكوت اتنكط بروحي ...

أو يظل فجري .. الك  غابة رماد ..

أيفيض بالوحشة أو ضياع أمورد الصوبين

ردني أردود

خليني على أدروب النده ...

طبع الكصب شدات ...

كل عكده أبحضنهن داوي بيها الكيظ

طاحني الذبول أوكل مسافاتي ...

العطش بيها الك ...

طوفان نوح أيفيض

لابسني التعب ومعاتبك بيبان ...

بيها امسورة روحي ولامفتاح ...

لارعشة ضوه أتطرز نهار الريح

روحي ابسد روازينك أخيوط أتراب ...

وي أول هبوب أتطيح

تبقى اليا وكت ؟

شمسك خجولة او مستحاها أيغرك التصبيح

تبقه اليا وكت ؟ يرجف ضواها .. أو نورها ..

الحيره ..أعله جرفه اتسيح

ردني أردود

كلشي امعلك أبروحي أعله حيله أيصيح

خليني أفل من مغزل الصفنات

عمري الغزلته السكته ابجفوف الريح

يلي وحشتك غابات !!

بالغربه دفك بالروح

شلال الحنين الما تشربه أسطورة التسبيح

وك عمري جزيرة او رمل ترس الروح

مصبوغه تظل روحي .. اوصبغها أجروح

يل وجهك سمه .. او نظرات عيني أنجوم

لو ماصح سمه .. وين النجوم أتروح ؟

وي..ي..ي..ي..ي..ين أتروح ؟