ذِمني..
اشما تذِمني ارتاح ..!
يارخص المذمَّه ابشفّة المرتاح
ذِمني... وفَزِّع اشما بيك
أخضّر ع الشتايم عود
يلسانك بخور اهنود
والنار التجيسه يشتِعِل فَوّاح
واشتِلني اعله شِفتَك هيل
وشمحله اعله شفتك من تطِگ قداح
ذِمني وجيس المخضْرات
مرّات المذَمّه اتصير بشفاف الصبر تفاح
ذِمني اشما تذمني ارتاح
حطني ابكل حضن منشار
گص بيهه الضلوع الواح
ولا ذمّك .... وجيب العايزَه ابطرواك
يانجمه وچذب تنلاّح
من طبع السبُوس ايطير....
لو طشَّه ابهوَه المِرواح
ويطيح الثگل للگاع....
بس طبع اليخُف ماطاح
وذبَحْني اعله جِبلة حيف
وشُكبرَه اليصير الحيف من كون اليحب ذبّاح
سوله اعله المذمَّه ارتاح
گطّعني ابمِسَه الگالات
تلگاني جديد.... ابكل جرف سبّاح
بير اشما تحوشه ايزود لو ماي الركد ينزاح
ذمني اشما تذمني ارتاح