الى الحزب الشيوعي العراقي  الخالد امس اليوم وغدا

هذه القصيدة المعبرة

للشاعر حسين جهيد الحافظ وردت للصفحة وهي موجهة الى الحزب الشيوعي العراقي، والذي يطلق عليه الشاعر اسم “النهر الثالث”، ليرافق دجلة والفرات في عطائهما وخلودهما. والقصيدة طويلة يزيد عدد كلماتها على900،  لذلك آثرنا ان تشغل المساحة الرئيسية لهذه الصفحة، نظرا الى ما تتمتع به من صدق في الطرح ووفاء في الموقف وقوة في البناء.

مو دوم الحزن لو طاحن الدمعات مرات ابفرح من تسگط الدمعه

عينك عالسمه واتناوش النجمات يالليلك طويل اشتنفع الدمعه

شده ابزود حيلك حيل .. لاوي الليل ، اصعد للشمس وي صوت الـ مفزعه

حط دم الشهيد الدرب وأمشي اعليه ذاك الموت واگف ما خذل ربعه

مد ضلعه جسر للوادم ايعبرون .. عزمه ما وهن عزمه ولا لحظه رجف ضلعه

وج اسنين عمره اشموع لعيون الوطن ما گال :

( أسف تعبت اشموعي)

شيوعي ! يا كفو او نعمين لو گالوا شيوعي

شايع كالبدر وأكثر شيوعي

اليضدني شفتهم مني شيوعي

أباهي الكون چي لني شيوعي

واعلي اويه النجم فوگ الثريه

اغني للنخل للماي لشفاف الورد بأحلام ورديه

تسولف للنده الولهان حنيه

اچفوفي بيض ٠٠حب الناس شوگ او طرز اوراقي

عراقي!

أديم الأرض من شيمة عراقي

على الموزين ما نبتت عراقي

عراقي او أفتخر انه عراقي

العراق ابوي ٠٠٠ وامي الناصريه

فهد جدي تلگه الموت شامخ والوجه باسم

( الشيوعية اقوى من الموت وأعلى من أعواد المشانق)

عمامي عادل او حازم .. جمال الحيدري او صارم

صبري صبر أيوب .. ولو حزني حزن يعگوب

ابدوي آبصبر ابدوي اتشيم

وبماي العراق اتوضه لو صليت او بنرابه العزيز ابشوگ اتيمم

اغني ابلحنه واعناده

( اليمشي ابدربنه شيشوف يابو علي لو موت لو سعاده)

هذوله احنه الگمر بينه زهه او نور

( زلم تشرين حدر البردي نتنطر)

نشافه للوكت قاده

( واحنه دربنه معروف يابو علي والوفه عدنه عاده )

زلم نتلاوه وي الموت ، تصميم أو أراده

رضعنه من ثدي ام الطيب

كل الطيب من گأع العراق البينه ولاده

حنان او شوگ غيره او طيب

مثل للناس عشرتنه عشگ محبوب او حبيب

كبرنه اويه النضال اسنين

من رحم الشعب من ناسنه الطيبين

من فرحة طفل بالعيد

من شهگة البرحي او لهفة امحبين

على احبال المشانق فوگ چتف الموت

صحنه ابصوت شنو الموت

فنه الموت ما يگدر علينه ايفوت

يصير الموت ميت واحنه التابوت

نغنيله لحن بيات ويانه الشعب عنه

(سالم حزبنه ما همته الصدمات سالم حزبنه)

شيمة زلم ٠٠ طبع الماز .. جدحة وفه او ومضة ماس

عزمنه للعزم مقياس

الصبر بينه نبت دنيه او بينه غيرة العباس

طبعنه (مالي الدنيه او شاغل الناس)

احساس الخلگ يل فاق كل احساس

نبراس الوفه او للصدگ هم نبراس

يرفرف فوگ٠٠فوگ الفوگ ٠٠تاج الرأس

بيه حب تيممنه

( علمنه احمر علمنه .. بيه منجل او چاكوچ احمر علمنه)

فخر للشامت ايگله، اذا گاع العراق اتباهت ابدجله

و ابماي الفرات او طيبته او اهله ، نهرين الفخر والشوگ والدهله

عاشگ خير كل واحد محنه أو للوفه باعث

حگه الشعب لو بيك يتباهه ، يحزب حسين انته يا نهر ثالث

شوگك عمر، غرة فجر ، شدة ورد

هيل او سعد واعيون غرگهه الدمع، دمع الفرح

زفة عرس فزة صبح ، عالدنيه تتطشر دوه رغم الجرح

رفرف فرحهه ابكل كتر رغم الحزن

أجمل لحن ، محتامه الوادم صدگ

ملگه او عشگ

يمطر ضوه ريه الوطن وانته الهوه

يا شاتل العودين ترچية غوه وإشفاف تضحك للهوه

يابو سوالف غاليات او بيض ، سواجي او بالنضال اتفيض

يمسقط رأس كل طيب نبع زينين

حزب حسين

يمهره أمأصله او خيالهه امعتبر

ما تبرد اجدامه او لا ابد فد يوم يتعثر

أشما طال المشي أشما طال ما يعثر

و لا تگصر خطوتك ، يالخطوتك دوم ما تگصر

أشما صار التعب و ايصير، أشما بينه الوكت أوجر

چي لن المعاند بيك سوله او بالألم تكبر

حروف اسمك چبيره اتزامط الدنيه تطش ابشوگ حريه

حزبك فهد للناس اجمل هديه .. برعم زرعته أحلام بالناصريه

برعم زرعته طگ خضر براعم .. حزبك فهد ما مات يشهد العالم

مثل ما جان هو اليوم .. بعيون الزلم مرسوم

همه او زود، يا طبع ثيل يمتعب الحاصود

تتباهه المناجل بيك ، بيك أشما تحش تكثر

يا مهرة حمد وابساعة المركاض تشگ الگأع ما تعثر

أشما طال المسير ابعزم تتنهد

يلوح النجم من تصهل رسنهه او للسمه تصعد

تشگ الليل من تجدح حوافرهه ضوه فوگ الگمر يمتد

تتغاوه النجوم ابنظرة اعيونك ، أعواد المشانق للزلم تشهد

فخاتي الهور تعشگ خطوتك والعگيد يعرف موش يتنشد

شهم وأجبال كردستان ٠٠ !

تعرفك كل قممهه او كل روابيهه

اشكثر ضمدت بيهه أجروح وأشگد غيرتك چانت تناغيهه

يالحبك عراق ابكل حرف طرز حروف أسمك

سهل وأجيال وديان او بواديهه

حمامه او سبگانك طيف وامگمر ، ابحب العراق ابكيف تتبختر

چبير الوادم ابجيتك خضرت حب او أماني

ايحگلهه بسمك دوم تنثر تهاني واتغني بسم آذار احله الأغاني

عشرتك گمريه يالغالي

( عمي عمي يبو مركب يبو اشراع الغالي بالهوه ايرفرف قميصك والهوه اشگد عالي)

طگ خنياب

طرز بالعشگ كل باب ( جنح اغنيده ) طاگ

ما معگود عالمهجور معگود ابصبر وأشعار

تحله الأغاني بيك ٠٠ يا شهر أذار

ما ظن ابد بالكون ٠٠ مثلك ابد صار

بشير الفرح والميلاد بسمك هلهلت بغداد

ابهواك ابنگرة السلمان غنبنه

محنه أو ناس وادموع الفرح تتجاره

( الما ايزور السلمان عمره خساره )

دگو الخشب طشو الغنه ابعين الحسد

( بعده عدل ما مات حزبك يا فهد )

او هلهلت تسواهن او بسمابه او ثجيله

( او هيله عليهم ٠٠٠ هيله الحزب بعده ابحيله)

او بعده ايتباهه ابن الحزب ، طبعه اصيل او سومري

(عامل من العمال يمه الحيدري خالد على الأجيال يمه الحيدري)

اعله حيطان السجن اسمه، عتلگ شمعة وفه او نسمه

ابحروف النور خط اسمه، ابخلگ راهب طبع رسمه

اده اللي عليه او زود ابكل طيب او حسن نيه

ابد ما گال شعليه

غنه بفرح رغم الاحزان البيه

( محله شهر آذار ٠٠ وآخره امحليه

مثله شهر ما صار .. حزبي انولد بيه)

حزب حسين !

رغم صيهود الوكت خنياب طبعه او يطگ دهله

اذا اتغاوه الفرات ابخوته الدجله

حگه حيل يتغاوه لان حبهم محنه الكل وفه وارث

يتغاوه الزمن بسمك بحزب حسين

يا كل العراق او طيبة النهرين ، اسمك للأمل باعث

وي دجله او فرات ابشوگ يبقه اسمك نهر ثالث

انته يا نهر ثالث