يا أول غرام .. انزرع بينه
يا غنوة وطن .. ع شفاف أهالينه
خبزه و فكر ثوّار
شمس و حچي بكل دار
وعلى اجروفك يا نهر ..
صرنه و تربينه
يا أول غرام .. انزرع بينه
***
أَنَه حسين الشهيد ..
و فهد روحي
ما هَمني أسواط النَذِل ..
خل تنزف اجروحي
سر الحزب ما ينحچي ..
يَ جروحي لَ تبوحي
خَل دمي يظَل سيّال
وثيقة شرف للأجيال
و يظل شعلة وطن ..
و تظل گمره محاچینه
یا أول غرام انزرع بينه
***
آني الشهيده
اليوم عيدي ..
يا شعب هَنوني
أحمر بلون الشمس ..
نفنوف لَبسوني
هذا عرسي اليوم ..
و بليلة عرس زفوني
مهري .. أشوفن كل هَلي
و مگلد .. امزينه منجَلي
و صوتك يا فؤاد يگول ..
يا سلام و يا سلام ..
گبرك وين دَلينه
يا أول غرام انزرع بينه
***
إحنه الشعب
جينه اندوّر .. بلا عنوان
عن گبرك سألنه بلكي الدفان
گال الموت بيد الطاغيه و سَجّان
ي حَفّار الگبر .. ما وصلوا الطيبين
تِفضَض شَعَرنه .. من النشد هاي اسنين
خاوانه الدمع ..
رافگ كل أغانينه
يا أول غرام انزرع بينه
يا غنوة وطن ع شفاف أهالينه
ــــــــــــــــــــــــــــــــــــــ
* لندن 14 . شباط .2024