امشي ياجسرّ لباب گهوتنه القديمه

البيها ودعنّه الاغاني ابليل تصرّخ ياحريمهّ

أنه والشارع وگلبي چنًه بيها اعيون عرّاف ومدينه... ضاعتّ امنيديّ ونستني ياصّبر گلي اشبدينه !؟ ويلي ياملعّب صبانه اشصار بينه...!؟ مستحاي ابعيني گمره ابزمن حايرّ..؟

والسنين ا خيول تركٌض بالمعابر..،

وأنه ياما اهواي طفّت ابذكرياتي..

..،شاطب اه‍مومي ابصلاتي..وماي دجله اتوضّه بيه..! گلبي شايلني ابرفيفه ونار شوگي التعتنيه اشگد صعب الگاج انه جسّد ميّت..روح مابيچ وكلامچ نستحّيه..!

اشلون يانهران اهلنه..!؟ اتصورّت الگاج مثل اسنين الاول فرّح دنيه..،ومدرسه واطيور بيت ....،واستكان الچاي يصحه ابطعمه راسي..

ومن محبتهاّ نحن ليها وتكضّ بينه الكراسي

وچان ياماچان بيه‍ا..يرگص الشاعر ابكيفه ويلعب ابراسه الخشّب..!

نخله چانت منً نهزًامتونها ابحرگه وترافه يمطر اعلينه الرطبّ ..،نستحي امن اخيالنه وحبنه مشاعر ويلي ، يامقهى الزهاوي،..!

أه ياروح المحبٌه..

النزحفّ الها ابلا وداع

هيّه مو خيمة حزّن ملتقى ابداع

اعيون تسه‍ر عالرصيف

ادلال وامعزّب مضيفّ

،وشوگ بيه طعّم الخبٌز..

الكلمه قرأن وشمس خضره وحرّز..

داخّت الحلوّه وقصايدنه بچتنه..!

ابچي ياجرح الگلب مليون مرّه ..،

،الحايط اخرسّ والسكون امرايّه ضايّع بيه وجهي ..والصدى البيها عتّب

ضيّعتني الارضّ والحصران والدلًه وشبابيچ الخشبّ ..! جيت مكسور الجناح وعاتبتها

صفنّت ابوجهي ورضع جدمي الشارع

والشته البردان يرجّف بالاصابع

انتي مو ،مقهى الزهاوي، اشصار بيچ..!؟

ضيعتني ولاچنت چن انه ابنها..!

چايها..او شباچها وحتى الكراسي..اتعذرتنه

اتمزقّت بيها صورًنه وغربتنه

ياهظيمه اتبدلّت بيها الوجوه أ وهلنستنهّ !