ميلاد الحزب / حسين جهيد الحافظ

أديم الأرض من شيمة عراقي

او على الموزين ما نبتت عراقي

عرافي ابكل فخر أنه عراقي

الي التاريخ شاهد بالتقيه

شروگ الشمس من طلة شروگي

على الطيبين يتكاثر شروگي

شروگي او افتخر انه شروكي

فهدنه ابوي وامي الشيوعيه

(۱) ميلاد الحزب وي الفرح توم

اليوم الفرح ماخذي حيل اليوم

يعزف هله او مرحبه

ويّاي واگف توم

ناشدته شنهو الخبر

گال الخبر معلوم

اليوم عيد الذي

عاشرته او عاشرني

من زمن لعب الجهل

توم ابزغر سنّي

الحزبي الشيوعي الذي

ابحبه مالكني

شوگه سفينة عشگ

للشوگ ياخذني

بیه امن اسولف صدگ

صار الصدگ فنّي

اشيوعي او بيَّ طبع

أشما اسنيني ضكّنّي

أصعد نغم للسمه

فيروز واتغنّي

صح أنه اون أبألم

بس ما ينسمع ونّي

گلبي أوذره وذر

لو يوم عاندني

بس ابغرام الحزب

مسموح اله أيغنّي

لن أمّي من ثديّ الوفه

من زغري رضعتني

حب الحزب والشعب

او بيه غذتني

او بالصدگ والصدگ

ابوي علمني

گللي اليعاشر فهد

لازم فهد مثله

أو لازم يشيل الگلب

بيرغ وله ليله

روحه اعله جنه نذر

بالصعبه والسهله

خنیاب دمه يطگ

ابساعة الصيهود

او لو يوم راده الحزب

ينطي العمر فرهود

او يكتب شهادة وفه

بويه الحزب موجود

ابصوت

او ضمير المحب

والناس كلهه اشهود

بيرغ يشيل الگلب

يمشي ابدرب المشوا

واجب عليها و ایزود

المشوا گبله زلم

كل زلمه منهم علم

او كل علم شايل علم

والعلم شایل نار

ابشوگ او محنة صدگ

للحزب منذورين

ابحب الشهاده مشوا

مو يوم هاي اسنين

من يوم خطه فهد

ابدمه والطيبين

درب الشهاده أنرسم

تسيورة امحبين

لاجل الحزب تضحيه

الروح الكلب والعين

زفة صواني شمع

للتسعه او الثمانين

**********************************

شيوعيين / سامي عبد المنعم

چنا صغار ...

حرمان وفقر ..

وبيوتنا من الطين

حفاي .. إبدشاديش اللعب

من التعب مطمورين

الخبز والچاي .. چان ريوگنا

بس چنا مرتاحين

نغبش للمدارس .. كاتبين إنشاء

سفرة إبيوم ممطر .. نحلم إمكيفين

نسمع سمع ...

عن سيخ الكباب .. وگيمر المعدان

صم ديري .. متاع المدرسة

ومانگرب الحانوت

ونطحن بالحزن بسكوت

لاعشنا الطفولة .. ولا فرحنا ابعيد

من دون الخلگ ..

من كلشي محرومين

وإبعز الشباب .. إتلاگفتنا احزاب

ومن حرب الحرب ...

نركض ومذعورين

خفنا إعله الوطن ينباگ

وابتالي الوكت ...

صرنا احنا مبيوگين

چان الوكت بس دربين ..

لو تمشي إبشرف ..

لو لازم إتطخ راس للعفنين

وتغربنا .. وعبرنا حدود

ورسمنا ابكل درب .. ثايات ونياشين

محطات وسچچ .. ونام جوعانين

نداوي جروحنا بالامل ..

بالنصر حلمانين

احزاب وحكومات ودكاكين إستفادت

وإحنا منسيين

وابو الزيتوني .. صاير تاج للغمان

صاحب موكب .. ويستقبل الماشين

وبس هوه اليحب حسين

مشاريع وعقود ولهف مليارات

بإسم الدين

وإحنا اللي نحب الناس ...

ونهاب الوطن والدين

باخير القافلة اصبحنا

لان رمز النظافة إحنا ويساريين

نبقه اهل الوطن والشعب

إحنا الشيوعيين

**************************

89 شمعة..  89 قبلة على جبين العراق / حذام يوسف طاهر

أمس چان الفرح عنوان للجلسة

هلهولة وغنى وضحكات بعيون الأهل ونسة

طير السعد حط روحه على متن الوكت ضحكة

وعِزَف لحنه وشتل غرسه

ومن مَر الوكت وية الحبايب

 والزمن يمشي وإيدك تحسه ..

ختمنة لذة الگعدة بحِلم تنعاد هالفرحة

بلمّة أكبر والضحك عالي لحدّ الغيم مو خلسة

ومن بطن السوالف نصنع الفرحة

يافرحة حزبنا التشبه العيد الچبير

من يجي الخطار شايل بإيده الفرح

وعيوننا تحرسه

*****************************

الى موفق محمد ابو خمره / احمد غيلان

ينهر الحلة يالكل النوارس حاطه براسك

تحب مايك

اماااان جروفك لناسك

تعارك بالحكومة وتنصر بناسك

ينهر اشعار من تصعد منصة تعلي فوك الغيم

تصهل والرسن صورة.

تتسالم غضب وتهز قوافي الغيظ بحروره.

تصرخ والدمع نظرات

تصرخ والحزن عثرات

بعيونك حزن الايام

عكسن لون قمصانك

يقمصانك احس اسرار بيهن ذني قمصانك

مسجون بوطن والوطن سجانك

جايبلك تعب وتفكله ذرعانك

فهمني شوكت ترتاح؟

مو عمرك ملح ذايب بجرح الماي

فهمني شوكت تغرك عطش بالماي؟

شغل سعدي  شغلي عشك اخضر

شغل سعدي خل نسمع ونين الماي

تغفى وي الحزن وتفز وطن مسلوب

حلمان وتفسر الحلم بالمكلوب

من هذا الوجع بس كلي يمتى اتوب؟

سمعني قصيدة تكول بيها

(كل ما ارجوه من السادة المشيعين)

معقوله تريد تموت؟ هو الضاك من هذا الحزن يرحل؟

الموت اليسمع اشعارك ينز دموع فوك المقصله ويخجل.

ابياتك حزن بالجرح تترتل...

دواوينك ارث للكاع للعدليين للميتين

للمي للشجر للدنيا تتسجل....

******************************

صويحب .. شال بيرغ / لفته عبد النبي الخزرجي

صويحب شال بيرغ ... ينشد على الريل

ايصيح مظفر وين سافر .. نزل عدنه الليل

ميلن لا تنكطن كحل .. غيلان ينزف هيل

وادموع الزلم بارود ... حشمنه الغطار بليل

وغيده تناغي وساهره  ..حمد وادموع منه اتسيل

وهودر من هواهم شوك .. شكبان الحزن ويميل

ومحطات القطار اشراع ... بضواها اسعود شد الحيل

وام شامات بيها   اعيون ... تتجادح  حوافر خيل 

وي المحابس شذر.... شدينه خزامات

والريل حمل حزن .. سافر على ام شامات

يا ريل  بين دغش ... والعشج عزل مات

ولا شفنه ريحة ضوه ..والدمع كت وشلات

بس حمد شايل علم ..ما همته اللجمات

وكضبة السنبل عشج ... معجون وي دمعات

وهذا الغطار ايسير ، يمشي بهده بالليل

ومظفر امعاشره .. ما بطل من الريل

من البصرة لأم شامات .. هودر هوى الحلوين

وتوج ليالي العشج .. شمعات   للماشين

تضوي الدروب وتشع .. ومعاشره الطيبين 

يللي عشكتوا  الدرب .. مفتوح باب العشج

والكمره تنطر حمد ... غيده تناغي الريل

يا ريل غيم وفه ..وامطر سوالف هيل

والريل عاشج حمد .. يحدي بسواد الليل 

والدمع يجري وشل .. والريل ينشد حمد

والشوك ما ينحزر ... يتنه الغطار بليل

والعشج ينحب لون ...غرب رفيجه بليل

وغيده تلم العشج ... تسمع صهيل الخيل

يا ريل مالك تصد ... انت رفيج الليل

وشنهو الجرى يا حمد ... والليل سافر حلم

ونظل ترى بحسرتك .. ننطر خبر لو علم 

بالك تخلي الحزن .. دولاب سجة ريل

والحزن كوطر يهف .. يشتم عطر يا هيل

والريل يشجي لحمد ... وادموع منه اتسيل

يا حمد يا فرحتي .. نتعاشر آنه  وياك

ونطش سوالف عشج ... نتسابك وي الريل

وجوّر هواهم ولك .. عافونه تالي الليل   

وحسرات تجري حزن .. وادموع يبجي الريل

واحنه عشكنه حمد ..نتوالف وي الريل